آسمان سے برستی بے رحم آفت نے بھارت کے شمال اور مشرق میں خوف و ہراس پھیلا دیا ہے۔ ریاست اترپردیش پر قدرت کا قہر اس طرح ٹوٹا کہ محض تین دنوں کے اندر شدید بارشوں اور سیلابی ریلوں نے 56 انسانوں کو لقمہ اجل بنا دیا۔ خلیج بنگال میں بننے والے شدید دباؤ نے دیکھتے ہی دیکھتے ہر طرف تباہی کی داستان رقم کر دی، جہاں معمول کی 7.6 ملی میٹر کے بجائے ریکارڈ 66.5 ملی میٹر بارانِ رحمت، زحمت بن کر برسی اور ایک ہزار سے زائد مکانات کے ساتھ کسانوں کے مستقبل کو بھی غرق کر دیا۔ 24 کروڑ نفوس پر مشتمل یہ خطہ اب بھی خطرے کے سائے میں سانس لے رہا ہے، مگر خوف کا یہ سلسلہ یہیں ختم نہیں ہوا۔ پڑوسی ریاست اوڈیسا میں بھی بپھرتے دریاؤں کے خوف سے 70 ہزار سے زائد بے بس شہری اپنے گھر بار چھوڑ کر محفوظ مقامات کی طرف بھاگنے پر مجبور ہو چکے ہیں۔ سڑکیں تباہ، پل غائب اور سیاحتی مراکز ویران ہو چکے ہیں، جبکہ طوفانی موسم ہر گزرتے لمحے کے ساتھ مزید ہولناک روپ دھار رہا ہے۔
News Source: Express News