انگلینڈ نے پاکستان میں ہونے والی ون ڈے ٹرائی سیریز کے لیے 16 رکنی اسکواڈ کا اعلان کر دیا ہے۔ فاسٹ بولر جوفرا آرچر کو مصروف سیزن کے بعد ورک لوڈ مینجمنٹ کے تحت آرام دیا گیا ہے جبکہ سینئر بیٹر جوز بٹلر انجری کے باعث اسکواڈ کا حصہ نہیں بن سکے۔ اسکواڈ میں میسن کرین، ہنری کروکومب اور جیمز کولز کو پہلی بار شامل کیا گیا ہے۔ لیگ اسپنر عادل رشید ہاتھ کی انجری سے مکمل صحتیاب ہونے کے بعد ٹیم میں واپس آئے ہیں جبکہ سام کرن بھی فٹ ہو کر دوبارہ اسکواڈ کا حصہ بن گئے ہیں۔ میسن کرین آٹھ سال کے طویل وقفے کے بعد انگلینڈ کی ٹیم میں واپس آئے ہیں۔ انہوں نے آخری بار 2018 میں آسٹریلیا کے خلاف سڈنی میں پانچویں ایشز ٹیسٹ میں انگلینڈ کی نمائندگی کی تھی، جبکہ وہ دو ٹی20 انٹرنیشنل میچز بھی کھیل چکے ہیں۔ انگلینڈ کے سلیکٹر مارکس نارتھ کے مطابق پاکستان میں ٹرائی سیریز مختلف کنڈیشنز میں مضبوط حریفوں کے خلاف ون ڈے اسکواڈ کو آزمانے کا بہترین موقع ہے۔ ہیری بروک ٹرائی سیریز میں انگلش ٹیم کی قیادت کریں گے۔ سیریز کے میچز راولپنڈی اور لاہور میں کھیلے جائیں گے جبکہ فائنل 31 اکتوبر کو لاہور کے قذافی اسٹیڈیم میں ہوگا۔ انگلینڈ کے اسکواڈ میں ہیری بروک (کپتان)، جو روٹ، بین ڈکٹ، ٹام بینٹن، جارڈن کاکس، میسن کرین، ہنری کروکومب، سام کرن، جیمز کولز، لیام ڈاسن، ول جیکس، گس ایٹکنسن، سونی بیکر، جیمی اوورٹن، عادل رشید اور جوش ٹونگ شامل ہیں۔
News Source: Express News