کیا آپ خود کو دبلا پتلا اور چست دیکھ کر مکمل محفوظ سمجھ رہے ہیں؟ خبردار! آپ کی ظاہری فٹنس کے پیچھے ایک خاموش قاتل چھپا ہو سکتا ہے۔ لندن کے نیو وکٹوریا اسپتال کی ماہر امراضِ قلب ڈاکٹر زوئی ایسٹرولاکس نے انتباہ جاری کیا ہے کہ دبلا جسم یا بظاہر صحت مند طرزِ زندگی معمول کے کولیسٹرول کی کوئی ضمانت نہیں۔ یہ عام غلط فہمی ہے کہ ہائی کولیسٹرول صرف موٹاپے، بڑھتی عمر یا ناقص خوراک والوں کو ہی نشانہ بناتا ہے۔ حقیقت اس سے کہیں زیادہ خطرناک ہے؛ کولیسٹرول کسی بھی واضح علامت کے بغیر برسوں تک خاموشی سے شریانوں میں جمتا رہتا ہے۔ یہ خراب کولیسٹرول (ایل ڈی ایل) نالیوں کو تنگ کر کے اچانک فالج یا جان لیوا ہارٹ اٹیک کا سبب بن سکتا ہے، جبکہ اچھے کولیسٹرول (ایچ ڈی ایل) کی کمی اس خطرے کو مزید بڑھا دیتی ہے۔ خاندانی تاریخ رکھنے والے افراد اس پوشیدہ جال کا سب سے آسان شکار ہو سکتے ہیں۔ ماہرین کے مطابق اس چھپے ہوئے خطرے کو بے نقاب کرنے کا واحد راستہ صرف خون کا ٹیسٹ ہے۔ اس لیے اپنی ظاہری صحت پر اندھا بھروسہ کرنے کے بجائے وقت پر جانچ کروائیں، ورنہ یہ خاموش دشمن کسی بھی لمحے وار کر سکتا ہے۔
News Source: Express News