پاکستانی اداکارہ ہانیہ عامر کے نئے عربی ٹیٹو نے سوشل میڈیا پر ایک بار پھر اپنے مداحوں کی توجہ اپنی جانب مبذول کروا لی ہے۔ اس ٹیٹو پر درج عربی عبارت ایک ایسا پیغام دیتی ہے جسے خود سے محبت اور اپنی ذات کو ترجیح دینے سے متعلق معنی خیز مشورہ قرار دیا جا رہا ہے۔ ڈرامے ’کبھی میں کبھی تم‘ سے بے پناہ شہرت حاصل کرنے والی ہانیہ عامر کے چاہنے والے پاکستان کے علاوہ سرحد پار بھی بڑی تعداد میں موجود ہیں اور وہ سوشل میڈیا پر بھی خاصی متحرک رہتی ہیں۔ اس سے قبل ڈرامے ’میرے ہمسفر‘ میں ہالا کے کردار نے ان کی مقبولیت کو مزید بڑھایا اور انہیں کامیابی کی نئی بلندیوں تک پہنچایا۔ اداکاری کے ساتھ ساتھ ہانیہ نے گزشتہ چند برسوں میں فیشن اور اسٹائل کے حوالے سے بھی اپنی الگ پہچان بنائی ہے۔ ان کے منفرد فیشن انداز، سادہ مگر دلکش لباس اور خاص طور پر ان کا ’پکسی کٹ‘ ہیئر اسٹائل مداحوں کی توجہ حاصل کرتا رہا ہے۔ ہانیہ کی شخصیت میں ٹیٹوز بھی ایک نمایاں پہلو ہیں۔ وہ اکثر اپنے انسٹاگرام پر تصاویر شیئر کرتی ہیں جن میں ان کے مختلف ٹیٹوز دکھائی دیتے ہیں۔ حالیہ تصاویر میں ان کے بائیں بازو پر کلائی سے کچھ اوپر بنا عربی ٹیٹو خاص طور پر نمایاں ہوا ہے۔ اس ٹیٹو پر عربی عبارت ’حب نفسک اولی‘ لکھی ہے، جس کا مطلب ہے ’سب سے پہلے خود سے محبت کریں‘۔ اس پیغام کو اس خیال سے جوڑا جاتا ہے کہ دوسروں سے محبت اور تعلق نبھانے سے پہلے انسان کو اپنی ذات، احساسات اور ضروریات کو بھی اہمیت دینی چاہیے۔ ہانیہ عامر کے جسم پر موجود یہ واحد نمایاں ٹیٹو نہیں ہے۔ انہوں نے 2023 میں بازو کے اندرونی حصے پر ’پاور پف گرلز‘ کے مشہور خیالی کردار ’ببلز‘ کا ٹیٹو بھی بنوایا تھا۔ اگرچہ ببلز ایک فرضی کردار ہے، لیکن اس کردار کی مہربانی، حساسیت، خوش مزاجی اور پوشیدہ طاقت جیسی خوبیاں ایسی ہیں جن سے ہانیہ خود کو وابستہ محسوس کرتی ہیں، جیسا کہ ان کے ٹیٹو کی پسند سے اندازہ لگایا جا سکتا ہے۔
News Source: Express News