گوگل کی بنیادی کمپنی الفابیٹ نے مصنوعی ذہانت کی دنیا میں اپنا نیا ماڈل ’جیمنائی 4 آرگون‘ متعارف کروا دیا ہے، جسے کمپنی کی جانب سے اب تک کا سب سے زیادہ طاقتور اے آئی ماڈل قرار دیا جا رہا ہے۔ یہ جدید ماڈل کوڈنگ، ریسرچ اور تحریر سمیت مختلف قسم کے پیچیدہ امور سرانجام دینے کی بھرپور صلاحیت رکھتا ہے۔ گوگل کے مطابق جیمنائی 4 آرگون کی سب سے بڑی خوبی سائبر سیکیورٹی کے میدان میں اس کی زبردست مہارت ہے۔ فی الوقت یہ ماڈل عام صارفین کے بجائے کمپنی کے مخصوص سائبر شراکت داروں کے لیے ہی دستیاب کیا گیا ہے۔ کمپنی نے اپنی بلاگ پوسٹ میں واضح کیا کہ آرگون کو دفاعی سائبر کاموں کے لیے خاص تربیت فراہم کی گئی ہے اور یہ خودکار طریقے سے سافٹ ویئر کی خامیوں کو تلاش کرنے کے علاوہ ان کو ٹھیک کرنے میں بھی مددگار ثابت ہو سکتا ہے۔ کوڈنگ کے شعبے میں بھی گوگل نے اس ماڈل کو انتہائی کارآمد قرار دیا ہے۔ کمپنی کے مطابق اس کے اپنے ملازمین روزمرہ کے کاموں، جن میں ڈی بگنگ اور کوڈ بیس کی منتقلی شامل ہے، کے لیے جیمنائی 4 آرگون کا استعمال کر رہے ہیں۔ گوگل کا کہنا ہے کہ یہ ماڈل طویل اور کٹھن نوعیت کے کام مکمل کرنے کی صلاحیت رکھتا ہے اور اس کا طریقہ کار اے آئی کے استعمال میں بڑی تبدیلی کا باعث بن سکتا ہے۔ اے آئی کی دوڑ میں گوگل کو ایک عرصے تک حریف کمپنیوں کے مقابلے میں پیچھے سمجھا جاتا رہا، تاہم جیمنائی کی حالیہ پیش رفت نے کمپنی کی پوزیشن کو نمایاں طور پر تبدیل کر دیا ہے۔ گوگل نے اگست میں بتایا تھا کہ جیمنائی استعمال کرنے والے افراد کی تعداد ایک ارب سے تجاوز کر چکی ہے۔
News Source: Express News