کور کمانڈرز کانفرنس میں واضح کیا گیا ہے کہ پاکستان کے لیے اندرونی استحکام انتہائی اہم ہے اور کسی بھی جواز پر پُرتشدد انتشار یا 9 مئی جیسے حالات پیدا کرنے کی کوشش سے فیصلہ کن طاقت اور قانون کے ساتھ بلاامتیاز اور بلا جھجھک نمٹا جائے گا۔ آئی ایس پی آر کے مطابق فیلڈ مارشل سید عاصم منیر کی زیر صدارت 277 ویں کور کمانڈرز کانفرنس منعقد ہوئی جس میں مسلح افواج، قانون نافذ کرنے والے اداروں اور وطن کے دفاع میں جانیں قربان کرنے والے شہریوں کے لیے فاتحہ خوانی کی گئی، اور شہدا کی لازوال قربانیوں کو زبردست خراج عقیدت پیش کیا گیا۔ شرکاء نے کہا کہ افغانستان سے ہونے والی دہشت گردی کے خلاف ٹارگٹڈ کارروائیاں پاکستان کا دفاعی حق ہیں، اور بھارت کے آلہ کار کے طور پر دہشت گردی کے سنگین نتائج کی ذمہ دار صرف طالبان کی مخبوط الحواس قیادت ہے۔ فورم نے انٹیلی جنس کی بنیاد پر جاری انسداد دہشت گردی کی کارروائیوں کو سراہتے ہوئے کہا کہ دہشت گردی کے خاتمے کے لیے زمینی ایکشن کے ساتھ بہترین انتظامی اور حکومتی اقدامات ناگزیر ہیں، اور گورننس کو بنیادی سطح پر عوام کے قریب لانا ضروری ہے۔ فورم نے زور دیا کہ عوام کے ساتھ دہشت گردی کی وجوہات پر موثر رابطے اور بیانیے پر کام کیا جائے، جبکہ جرائم اور دہشت گردی کے گٹھ جوڑ کو توڑنے کے لیے پولیس کی صلاحیت میں اضافہ ناگزیر ہے۔ فورم نے اس عزم کا اعادہ کیا کہ ملکی داخلی استحکام پر کوئی سمجھوتہ نہیں ہوگا اور 9 مئی جیسے حالات پیدا کرنے کی کسی بھی سازش کو قانون کی پوری طاقت سے کچل دیا جائے گا۔ کانفرنس میں پاکستان، سعودی عرب اور ترکیہ کے مابین طے پانے والے مکہ مشترکہ دفاعی معاہدے کا خیرمقدم کیا گیا اور اسے دیرینہ دفاعی تعاون کے فروغ میں سنگ میل قرار دیا گیا۔ شرکاء نے سعودی عرب کے خلاف حوثی حملوں کی شدید مذمت کی اور برہمی کا اظہار کرتے ہوئے حرمین شریفین کے تحفظ اور سعودی عرب کے ساتھ یکجہتی کے عزم کا اعادہ کیا۔ شرکاء نے مسئلہ کشمیر کو اقوام متحدہ کی قراردادوں اور کشمیری عوام کی امنگوں کے مطابق حل کرنے کا بھی مطالبہ کیا۔ فیلڈ مارشل نے انٹیلی جنس بیسڈ آپریشنز کو مزید موثر بنانے اور جدید ٹیکنالوجی و تربیت کے ذریعے دفاعی صلاحیتیں بڑھانے کی ہدایت کی اور کہا کہ عوام کی غیر متزلزل حمایت کے ساتھ مسلح افواج ملکی خودمختاری اور قومی سلامتی کے دفاع کے لیے مکمل تیار ہیں۔
News Source: Express News