وفاقی وزارت مذہبی امور نے سرکاری عازمین حج 2027 کے لیے اہم ہدایات جاری کر دی ہیں جن کے مطابق حج واجبات کی دوسری قسط 5 اکتوبر بروز پیر سے 20 اکتوبر تک جمع کروائی جا سکے گی۔ ترجمان وزارت مذہبی امور کے مطابق سرکاری عازمین حج اپنی دوسری قسط پاک حج ایپ یا ڈیجیٹل پورٹل کے ذریعے جمع کروا سکتے ہیں، لہٰذا تمام عازمین مقررہ مدت کے اندر ادائیگی لازمی یقینی بنائیں۔ ترجمان نے خبردار کیا ہے کہ آخری تاریخ تک واجبات جمع نہ کروانے کی صورت میں حج درخواست منسوخ تصور کی جائے گی اور جمع شدہ رقم متعلقہ عازم کے اکاونٹ میں واپس بھیج دی جائے گی۔ وزارت مذہبی امور کے مطابق دوسری قسط جمع کروانے سے قبل عازمین کے لیے میڈیکل فٹنس سرٹیفکیٹ پاک حج ایپ یا ڈیجیٹل حج پورٹل پر اپ لوڈ کرنا لازمی قرار دیا گیا ہے۔ ترجمان نے واضح کیا کہ سرکاری عازمین حج مقررہ تاریخ سے پہلے تمام ضروری کارروائی مکمل کر لیں۔
News Source: Express News