ڈی پی ورلڈ انٹرنیشنل لیگ ٹی ٹوئنٹی کے پانچویں سیزن کی کھلاڑیوں کی نیلامی کی فہرست جاری کردی گئی ہے جس میں پاکستان کے نامور بلے باز بابر اعظم سمیت کئی عالمی شہرت یافتہ کھلاڑی شامل ہیں۔ تفصیلات کے مطابق نیلامی یکم اکتوبر کو دبئی کی آئی سی سی اکیڈمی میں ہوگی جس میں تئیس ممالک کے دو سو سے زائد کرکٹرز حصہ لیں گے۔ کھلاڑیوں کو اسی ہزار، چالیس ہزار اور دس ہزار امریکی ڈالر کی بنیادی قیمت کے تین گروہوں میں تقسیم کیا گیا ہے۔ اسی ہزار ڈالر والے سب سے بڑے گروپ میں بابر اعظم کے علاوہ فل سالٹ، ٹام بینٹن، رحمان اللہ گرباز، وانندو ہسارنگا، فاف ڈو پلیسی، لیام لیونگ اسٹون، الزاری جوزف، فخر زمان، نسیم شاہ، معین علی، جونی بیئرسٹو، ایلیکس ہیلز اور کرس ووکس جیسے نام شامل ہیں۔ چالیس ہزار ڈالر کے گروپ میں شاداب خان، ابراہیم زادران، جیڈن سیلز، تبریز شمسی، شرف الاسلام، کوشل پریرا، گل بدین نائب اور دیگر نمایاں کھلاڑی موجود ہیں۔ دس ہزار ڈالر کے زمرے میں ریزا ہینڈرکس، مہدی حسن میراز، جارج منسی، ایش سودھی اور میتھیو پوٹس شامل ہیں۔ متحدہ عرب امارات، کویت اور سعودی عرب کے تمام کھلاڑی دس ہزار ڈالر کی بنیادی قیمت سے نیلامی میں شامل ہوں گے۔ ٹیموں کو متحدہ عرب امارات کے کسی ایک سابق کھلاڑی پر رائٹ ٹو میچ کا اختیار بھی حاصل ہوگا۔ ہر فرنچائز کو کم از کم اٹھارہ اور زیادہ سے زیادہ تئیس کھلاڑیوں کا دستہ مکمل کرنا ہوگا۔ ہر میچ کی کھیلنے والی گیارہ رکنی ٹیم میں کم از کم دو متحدہ عرب امارات، دو افغان اور ایک مزید وابستہ ملک کا کھلاڑی شامل کرنا لازمی ہوگا۔ نیلامی کے لیے ہر ٹیم کے پاس مختلف مالی وسائل مختص کیے گئے ہیں جن میں ایم آئی ایمریٹس سب سے بڑے پرس کے ساتھ میدان میں اترے گی۔
News Source: Express News