انٹرنیشنل کرکٹ کونسل (آئی سی سی) نے یکم اکتوبر سے شروع ہونے والی بین الاقوامی سیریز کے لیے پلیئنگ کنڈیشنز میں کئی اہم تبدیلیاں نافذ کر دی ہیں۔ ان نئے قوانین کا بنیادی مقصد وقت کے ضیاع کو روکنا، گیند کے معیار کو یکساں بنانا اور فیلڈنگ سے متعلق ضوابط کو مزید واضح کرنا ہے۔ نئے ضوابط کے تحت مردوں کی کرکٹ میں اگر کوئی بیٹر مقررہ وقت کے اندر اگلی گیند کا سامنا کرنے کے لیے تیار نہ ہو تو پہلی بار تنبیہ اور دوسری بار آخری وارننگ دی جائے گی، جبکہ تیسری اور اس کے بعد ہر خلاف ورزی پر فیلڈنگ ٹیم کو پانچ اضافی رنز دیے جائیں گے۔ مسلسل خلاف ورزیوں کی صورت میں ضابطہ اخلاق کے تحت کارروائی بھی ہو سکتی ہے۔ خواتین کی بین الاقوامی کرکٹ میں استعمال ہونے والی گیندوں کے سائز اور وزن کے لیے بھی سخت معیار مقرر کیے گئے ہیں، جس کے تحت مردوں، خواتین اور جونیئر کرکٹ کے لیے گیند کی الگ الگ خصوصیات ہوں گی۔ آئی سی سی نے دن کے وقت کھیلے جانے والے ٹیسٹ میچز میں گلابی گیند کے استعمال کا تجرباتی آغاز بھی کیا ہے۔ مزید برآں، ٹیسٹ میچ کے آخری اوور میں وکٹ گرنے کے بعد دن کا کھیل ختم کرنے سے متعلق طریقہ کار میں بھی تبدیلی کی گئی ہے۔ اب دن کے آخری اوور میں وکٹ گرنے کی صورت میں کھیل ختم نہیں ہوگا بلکہ اوور مکمل کیا جائے گا۔
News Source: Express News