فیڈرل بورڈ آف ریونیو (ایف بی آر) نے رواں ماہ ستمبر 2026 اور رواں مالی سال 2026-2027 کی پہلی سہ ماہی (جولائی تا ستمبر) کے لیے آئی ایم ایف کے ساتھ طے شدہ ٹیکس وصولیوں کے اہداف 100 فیصد سے زائد حاصل کر لیے ہیں۔ ایکسپریس نیوز کے مطابق ایف بی آر نے نہ صرف آئی ایم ایف کے طے کردہ اہداف مکمل طور پر حاصل کیے بلکہ پہلی سہ ماہی کے دوران 3053 ارب روپے کے مقررہ ہدف سے 25 ارب روپے زائد ٹیکس اکٹھا کیا، جبکہ ستمبر 2026 میں بھی وصولیاں مقررہ ہدف سے زیادہ رہیں۔ ایف بی آر کا کہنا ہے کہ آئندہ چند روز میں حتمی اعداد و شمار موصول ہونے پر ٹیکس وصولیوں میں مزید اضافہ ہوگا، جبکہ ادارے کو ٹیکس دہندگان کی جانب سے اب تک 57 لاکھ انکم ٹیکس گوشوارے بھی موصول ہو چکے ہیں۔ تازہ ترین اعداد و شمار کے مطابق ایف بی آر کو رات گئے تک موصول ہونے والی تفصیلات کے تحت ستمبر 2026 میں 1355 ارب روپے کی ٹیکس وصولیاں ہوئیں، جبکہ اس ماہ کا مقررہ ہدف 1330 ارب روپے تھا۔ اس کے علاوہ پہلی سہ ماہی میں عبوری خالص ٹیکس وصولی 3078 ارب روپے رہی ہے۔ گزشتہ مالی سال کے اسی عرصے میں 2889 ارب روپے کا ٹیکس اکٹھا کیا گیا تھا، یوں رواں مالی سال کی پہلی سہ ماہی میں گزشتہ سال کے مقابلے میں 189 ارب روپے زیادہ خالص ریونیو حاصل کیا گیا۔ تفصیلات کے مطابق جولائی 2026 سے ستمبر 2026 تک انکم ٹیکس کی مد میں 1432 ارب روپے، سیلز ٹیکس کی مد میں 1136 ارب روپے، فیڈرل ایکسائز ڈیوٹی کی مد میں 197 ارب روپے اور کسٹم ڈیوٹی کی مد میں 312 ارب روپے وصول کیے گئے۔ ایف بی آر نے پہلی سہ ماہی کے دوران 203 ارب روپے کے ریفنڈز بھی جاری کیے، جبکہ گزشتہ رات گئے تک موصول ہونے والے گوشواروں کی مجموعی تعداد 57 لاکھ سے تجاوز کر چکی ہے۔
News Source: Express News